Fáilte chuig gaa.ie - suíomh oifigiúil CLG
Bainisteoir Ciarraí Eamonn Fitzmaurice.
Bainisteoir Ciarraí Eamonn Fitzmaurice.

Ní haon scéal nua é Páirc an Chrócaigh do Chiarraí


Le Conchúr Ó Sé

Is minic go ndeirtear go bhfuil dhá chinnteachta ann sa saol agus is iad bás agus íocaíochtaí cánach. Ach ó cuireadh tús leis an bhformáid nua de Chraobhchomórtas peile na hÉireann sa bhliain 2001 is féidir ábhar eile a chur leis an liosta sin: Ciarraí ag imirt i gcluiche ceathrú ceannais na hÉireann.

Ag deireadh mí Iúil agus ag tús mí Lúnasa a chuirtear tús leis an gcomórtas díbeartha sa rás ar son Chorn Sam Maguire agus gan mheath, bíonn Ciarraí ann i gcónaí. Anuas ar seo, tá an cruthúnas ann go dtaitníonn an stáitse mór leo ag imirt i bPáirc an Chrócaigh ag an tráth seo den bhliain. As an 16 chluiche cheathrú ceannais a bhfuil imeartha acu go dtí seo tá 14 cinn buaite acu. Ba é 2012 an uair dheireanach a chaill Ciarraí ag an bpointe seo agus tharla sé seo i gcoinne sheaimpíní na bliana sin, Dún na nGall. Ní raibheadar in ann cosaint fhíochmhar na Conallaigh a bhriseadh síos agus ag deireadh an chluiche sin léigh an scór 1-12 go 1-10.

Ba é contae an Dúin a mhúscail an suaitheadh ba mhó as an tír i 2010 nuair a bhuadar ar an Ríocht agus 6 phointe le spáráil acu orthu. Seachas an dá ócáid sin, is íomhá scanrúil iad na geansaithe glasa agus órga do chontae ar bith, sna cluichí ceathrú ceannais uilig seachas an chéad chluiche i gcoinne Bhaile Átha Cliath i 2001 tá 27-259 scóráilte acu agus 13-167 géillte acu, difríocht scórála 14-92.

Sea, is dócha go bhfeicfear an staitistic seo agus go smaoineofar ar an bhfrása sin faoi bhréaga agus staitisticí ach mar sin féin, bíonn peileadóirí Chiarraí ar nós Ferrari ag bailiú luais go tapa ag an stáitse seo agus go hiondúil, is deacair iad a stopadh. Tagann siad ar ais arís agus arís eile, tríd Chúige Mumhan nó tríd an gcúldoras, cuma cén bhealach.

Le linn tréimhse bhainistíochta Éamonn Fitzmaurice níor chaill siad ag an stáitse seo ariamh agus beidh siad dírithe ar Ghaillimh Dé Domhnaigh beag seo leis seo a choimeád slán.

Bhuaileadar sa bhliain 2014 ag an stáitse céanna seo, áit ar bhuaigh Ciarraí ar scór 1-20 go 2-10 agus is é an rud is mó a sheasann amach ón gcluiche sin ná cúl gleoite James O’Donoghue isteach go hArdán Uí Daibhín ag bailiú na liathróide ó Johnny Buckley, ag casadh go slachtmhar agus ag fágáil cosantóir na Gaillimhe ina dhiaidh ar nós scoláire a d’imigh an bus uathu. Bhí an cumas peile aige a chuid coise a athrú ag tógáil soló lena chos chlé agus ag críochnú go hard leis an gcos deis isteach in eangach na Gaillimhe.

I 2008, d’imir Fir na dTreibheanna agus An Ríocht in amharca a chéile i gceann de na cluichí ab fhearr i bPáirc an Chrócaigh. Bhí na scamaill amuigh, agus bhí sé ag stealladh báistí, rud a chuir go mór leis an ardchaighdeán peile iontas na n-iontas! Ní raibh Ceanncheathrú CLG ach leathlán don chluiche agus bhog an lucht féachana suas agus amach ón mbáisteach in Ardán Uí Chíosóg agus Uí hÓgáin ar mhaithe leo féin a choimeád tirim.

Ní rabhthas ag tabhairt seans ar bith do Ghaillimh roimh ré, cé gur sheaimpíní Chonnachta iad ag an am, ach bhíodar chun tosaigh ar Chiarraí leathslí tríd an dara leath. Chuir Michael Meehan ardtaispeántas ar fáil ag aimsiú scór de 0-10 ón dá chos le 0-06 ag teacht ón imirt. Stiúir an seanfhondúir, Pádraic Joyce, imirt na Gaillimhe an lá úd sin. Do Chiarraí, bhí Declan O’Sullivan inspioráideach, ag aimsiú scóir, ag stiúradh na himeartha agus bhí mí-ádh air nár aimsigh sé cúl den scoth sa chéad leath sin ag seoladh a iarrachta as cuaille na Gaillimhe. Ach arís eile ba é Colm ‘Gooch’ Cooper a d’fhuascail Ciarraí ón gcontúirt, ag aimsiú 0-03 agus a bhí mar chroílár imirt na Ríochta. Chríochnaigh an cluiche sin ar scór 1-21 go 1-15 i bhfábhar fhir Pat O’Shea. Fuair Tír Eoghain an lámh in uachtar orthu níos déanaí sa chluiche cinniúnach áfach.

Níl na staitisticí ar thaobh na Gaillimhe. Ó bhuadar Craobh na hÉireann i 2001, níl cluiche sa chomórtas céanna sin buaite acu i bPáirc an Chrócaigh; olltriomach ar fad. Ag an tréimhse seo, cabhraíonn sé le foirne aithne mhaite a bheith acu ar na laethanta mór i bPáirc an Chrócaigh. Tá chuile thabhairt difriúil ó imirt i staid eile timpeall na tíre agus cabhróidh an taithí seo go mór le Ciarraí agus iad ag imirt sa dara bhaile dóibh. Deirtear gur dána gach madra i ndoras a thí féin agus beidh Ciarraí réidh.

Official Sponsors of the GAA Football All-Ireland Championship

Official Sponsors of the GAA Hurling All-Ireland Championship

Live Competitions